ກອງປະຊຸມສຳມະນາເປີດກວ້າງ ເພື່ອລະດົມຄວາມຄິດເຫັນຕໍ່ຮ່າງບົດຄົ້ນຄວ້າ ຫົວຂໍ້: “ການຄົ້ນຄວ້າທິດສະດີ ແລະ ສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ” ຢູ່ແຂວງພາກໃຕ້.

ລາຍລະອຽດ

ສ້າງຂື້ນເມື່ອ ວັນອັງຄານ, 10 ພຶດສະພາ 2022 07:09

ຂຽນໂດຍ ptcps

        ກອງ​ປະ​ຊຸມ​ສຳ​ມະ​ນາ​ເປີດກວ້າງ ເພື່ອ​ລະ​ດົມ​ຄວາມ​ຄິດ​ເຫັນ​ຕໍ່​ຮ່າງ​ບົດ​ຄົ້ນ​ຄວ້າ ຫົວ​ຂໍ້: “ການຄົ້ນຄວ້າທິດສະດີ ແລະ ສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ” ຢູ່ແຂວງພາກໃຕ້.

   ໃນວັນທີ 10 ພຶດສະພາ 2022; ສະພາທິດສະດີສູນກາງພັກ ໄດ້ຈັດກອງປະຊຸມສໍາມະນາເປີດກວ້າງ ​ເພື່ອ​ລະດົມຄວາມຄິດເຫັນປະກອບໃສ່ຮ່າງຄົ້ນຄວ້າສະບັບຫຍໍ້ ໃນຫົວຂໍ້: “ການຄົ້ນຄວ້າທິດສະດີ ແລະ ສະຫຼຸບພຶດຕິກຳໃຫ້ແກ່ການສ້າງປະຖົມປັດໄຈ ເພື່ອກ້າວເດີນສູ່ຈຸດໝາຍສັງຄົມນິຍົມ” ທີ່ຫ້ອງປະຊຸມໃຫຍ່ຫ້ອງວ່າການແຂວງຈຳປາສັກ ໂດຍການເປັນປະທານຮ່ວມ ຂອງສະຫາຍ ປອ ກິແກ້ວ ຈັນທະບູລີ ຮອງປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ, ຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກ; ສະຫາຍ ສາຍທອງ ໄຊຍະວົງ ຮອງເລຂາພັກແຂວງ, ປະທານສະພາປະຊາຊົນແຂວງຈຳປາສັກ, ມີບັນດາສະຫາຍຮອງເລຂາພັກແຂວງ, ຄະນະປະຈຳພັກແຂວງ, ຄະນະພັກເມືອງ ແລະ ພະແນກການຕ່າງໆຈາກ 5 ແຂວງພາກໃຕ້ເຂົ້າຮ່ວມ

  ໃນພິທີ ສະຫາຍ ປອ ກິແກ້ວ ຈັນທະບູລີ ຮອງປະທານສະຖາບັນວິທະຍາສາດເສດຖະກິດ-ສັງຄົມແຫ່ງຊາດ, ຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກ ໄດ້ໃຫ້ກຽດກ່າວເປີດ ແລະ ໃຫ້ຮູ້ວ່າກອງປະຊຸມຄັ້ງນີ້ມີຄວາມໝາຍຄວາມສຳຄັນຫຼາຍ ເພາະວ່າການຄົ້ນຄວ້ານີ້ຈະເປັນການປະກອບສ່ວນເຂົ້າໃນການປັບປຸງ ແລະ ສ້າງພັກເຮົາໃຫ້ເຂັ້ມແຂງທາງດ້ານສະຕິປັນຍາ ແລະ ຄວາມສາມາດນຳພາໃນທົ່ວສັງຄົມ ຄຸນຄ່າ ກໍ່ຄື ຄຸນຜົນປະໂຫຍດຂອງການຄົ້ນຄວ້າຫົວຂໍ້ດັ່ງກ່າວນີ້ ແມ່ນເພື່ອສ້າງເປັນບ່ອນອີງທາງດ້ານທິດສະດີວິທະຍາສາດ ແລະ ພຶດຕິກຳໃຫ້ແກ່ການກຳນົດທັດສະນະແນວທາງແຜນນະໂຍບາຍຂອງພັກເຮົາໃນເງື່ອນໄຂໃໝ່ ແລະ ເປັນພື້ນຖານໃຫ້ແກ່ການຮ່າງໂຄງການການເມືອງຂອງພັກເຮົາ ແຕ່ນີ້ຮອດປີ 2030 ເຊິ່ງຄາດວ່າຈະນຳສະເໜີຮັບຮອງເອົາໃນກອງປະຊຸມໃຫຍ່ ຄັ້ງທີ XII ຂອງພັກໃນຕໍໜ້າ. 

    ຫຼັງຈາກນັ້ນ ສະຫາຍ ປອ ດາວສະຫວັນ ເຄືອມີໄຊ  ຫົວໜ້າສູນຄົ້ນຄວ້າແນວຄິດໄກສອນ ພົມວິຫານ, ຮອງຫົວໜ້າຄະນະເລຂາທິການວິທະຍາສາດ ສະພາທິດສະດີສູນກາງພັກໄດ້ລາຍງານ​ໂດຍສັງເຂບກ່ຽວ​ກັບ​ເນື້ອ​ໃນ​ບົດ​ຄົ້ນ​ຄວ້າ​ທິດ​ສະ​ດີ ແລະ​ ສະ​ຫຼຸບ​ພຶດ​ຕິ​ກຳ​ໃຫ້​ແກ່​ການ​ສ້າງ​ປະ​ຖົມ​ປັດ​ໄຈ ເພື່ອ​ກ້າວ​ເດີນ​ສູ່​ຈຸດ​ໝາຍ​ສັງ​ຄົມ​ນິ​ຍົມ (ສະ​ບັບ​ຫຍໍ້) ຕໍ່ກອງປະຊຸມ ໂດຍ​ຍົກ​ໃຫ້​ເຫັນພື້ນ​ຖານ​ທິດ​ສະ​ດີ ແລະ​ພຶດ​ຕິ​ກຳ​ກ່ຽວ​ກັບ​ການ​ສ້າງ​ບັນ​ດາ​ປັດ​ໄຈ​ເພື່ອ​ກ້າວ​ເດີນ​ສູ່​ຈຸດ​ໝາຍ​ສັງ​ຄົມ​ນິ​ຍົມ​; ຂະ​ບວນ​ວິ​ວັດ​ແຫ່ງ​ການ​ກຳ​ເນີດ ແລະ​ສ້າງ​ບັນ​ດາ​ປັດ​ໄຈ ເພື່ອ​ກ້າວ​ເດີນ​ສູ່​ຈຸດ​ໝາຍ​ສັງ​ຄົມ​ນິ​ຍົມ; ການ​ສືບ​ຕໍ່​ສ້າງ​ປັດ​ໄຈ​ໃຫ້​ແກ່​ການ​ກ້າວ​ເດີນ​ສູ່​ຈຸດ​ໝາຍ​ສັງ​ຄົມ​ນິ​ຍົມ ຢູ່​ປະ​ເທດ​ເຮົາ.

          ພ້ອມ​ດຽວ​ກັນ​ນັ້ນ, ປະທານກອງປະຊຸມ ໄດ້ມີຄໍາຖາມເຈາະຈີ້ມໃນບາງບັນຫາທີ່ຍັງບໍ່ທັນຈະ​ແຈ້ງ ເພື່ອສົນທະນາແລກ​ປ່ຽນຄຳ​ຄິດ​ເຫັນກັບຜູ້ເຂົ້າຮ່ວມກອງປະຊຸມໂດຍສະເພາະການນຳຂອງ 5 ພາກໃຕ້, ພ້ອມທັງໄດ້ຊີ້ນຳການປະກອບຄຳເຫັນໃຫ້ມີລັກສະນະວິທະຍາສາດ ເພື່ອຮັບໃຊ້ໃຫ້ແກ່ການປັບປຸງເນື້ອໃນບົດຄົ້ນຄວ້າໃຫ້ມີຄຸນນະພາບດີຂຶ້ນກວ່າເກົ່າ ແລະສອດຄ່ອງກັບສະພາບຄວາມເປັນຈິງໃນປັດຈຸບັນ. ໃນໂອກາດນີ້, ກໍໄດ້ຕີລາຄາສູງຕໍ່ຄະນະຮັບ​ຜິດ​ຊອບ​ການ​ຄົ້ນ​ຄວ້າ​ໃນ​ຂົງ​ເຂດ​ຕ່າງໆ​ທີ່​ໄດ້​ເປັນ​ເຈົ້າ​ການ​ໃນ​ການ​ຄົ້ນ​ຄວ້າ-ຂຽນ​ຮ່າງ​ສະ​ບັບ​ເບື້ອງ​ຕົ້ນ ກໍ​ຄື​ບັນ​ດາ​ການນຳຂອງ 5 ແຂວງພາກໃຕ້ ແລະ ພາກສ່ວນ​ທີ່ກ່ຽວ​ຂ້ອງ​ທີ່​ໄດ້​ສຸມ​ສະ​ຕິ​ປັນ​ຍາເຂົ້າ​ໃນ​ການ​ຄົ້ນ​ຄວ້າ; ຊົມ​ເຊີຍກອງ​ເລ​ຂາ​ດ້ານ​ເນື້ອ​ໃນທີ່ເປັນເຈົ້າການສັງ​ລວມ​ປັບ​ປຸງເນື້ອ​ໃນ, ​ສ້າງ​ເປັນ​ສະ​ບັບຮ່າງ ແລະ​ ສັ​ງ​ລວມສະ​ບັບ​ສັງ​ລວມ​ຫຍໍ້​ທີ່​ມີ​ເນື້ອ​ໃນ​ຈະ​ແຈ້ງ​ຂຶ້ນ​ຕື່ມ.

          ໃນ​ຕອນ​ທ້າຍຂອງກອງ​ປະ​ຊຸມ ​ປະ​ທານກອງ​ປະ​ຊຸມໄດ້ໃຫ້ທິດຊີ້ນໍາໃນການສືບ​ຕໍ່​ນຳ​ເອົາ​ເນື້ອ​ໃນ​ຈິດ​ໃຈ ຂອງກອງ​ປະ​ຊຸມ​ໃນ​ຄັ້ງ​ນີ້ ເພື່ອ​ໃຫ້​ຄະ​ນະ​ຮັບ​ຜິດ​ຊອບ​ດ້ານ​ເນື້ອ​ໃນ​ສຸມ​ໃສ່ປັບປຸງຮ່າງເນື້ອໃນບົດຄົ້ນຄວ້າ ແລະ​ນຳ​ເອົາ​ຮ່າງ​ເນື້ອ​ໃນ​ບົດ​ຄົ້ນ​ຄວ້າ​ດັ່ງ​ກ່າວ​ລົງ​ທາບ​ທາມ​ຄຳ​ຄິດ​ເຫັນຢູ່​ຂັ້ນ​ສູນ​ກາງ ແລະ​ ທ້ອງ​ຖິ່ນ ​ເພື່ອ​ເຮັດ​ໃຫ້​ການ​ປັບ​ປຸງ​ເນື້ອ​ໃນ ແລະ​ຂໍ້​ມູນ​ຕ່າງໆ​ໄດ້​ມີ​ວິ​ທະ​ຍາ​ສາດ, ສອດ​ຄ່ອງ​ກັບ​ຕົວ​ຈິງ ແລະ​ນຳ​ໄປ​ສະ​ເໜີ​ໃນ​ກອງ​ປະ​ຊຸມ​ສູນ​ກາງ​ໃນ​ຄັ້ງ​ຕໍ່​ໄປ; ຫຼັງຈາກນັ້ນ, ກອງປະຊຸມກໍໄດ້ປິດລົງຢ່າງເປັນທາງການໃນຕອນທ່ຽງຂອງວັນດຽວກັນ.

• < ຕໍ່ໄປ
• ຕໍ່ໄປ >