ຄະນະໂຄສະນາອົບແຂວງ ເປີດຊຸດຝຶກອົບຮົມເປົ້າໝາຍທີ່ຈະຂະຫຍາຍເຂົ້າພັກ ຊຸດທີ III ປະຈຳປີ 2022

   ຄະນະໂຄສະນາອົບແຂວງ ໄດ້ເປີດຊຸດຝຶກອົບຮົມເປົ້າໝາຍທີ່ຈະຂະຫຍາຍເຂົ້າເປັນສະມາຊິກພັກ ຊຸດທີ III ປະຈຳປີ 2022 

     ໃນຕອນເຊົ້າຂອງວັນທີ 4 ສິງຫາ 2022 ຄະນະໂຄສະນາອົບແຂວງ ໄດ້ເປີດຊຸດຝຶກອົບຮົມເປົ້າໝາຍທີ່ຈະຂະຫຍາຍເຂົ້າເປັນສະມາຊິກພັກ ຊຸດທີ III ປະຈຳປີ 2022 ຂຶ້ນທີ່ຫ້ອງປະຊຸມອົງການກາແດງແຂວງຈໍາປາສັກ, ພາຍໃຕ້ການໃຫ້ກຽດເປັນປະທານກ່າວເປີດຂອງ ສະຫາຍ ບຸນປັນ ມະຫາລາດ ຮອງເລຂາໜ່ວຍພັກຮາກຖານ ຮອງຫົວໜ້າຄະນະໂຄສະນາອົບຮົມແຂວງ.

 

     ໂດຍມີ ສະຫາຍ ສົມພອນ ວິສິໄລສົມ ຫົວໜ້າຂະແໜງອົບຮົມ(ຄະນະໂຄສະນາອົບຮົມແຂວງ), ມີຄະນະພັກຮາກຖານ, ຄະນະໜ່ວຍພັກຮາກຖານອ້ອມຂ້າງແຂວງ, ຄະນະຮັບຜິດຊອບຊຸດອົບຮົມ ແລະ ບັນດາສະຫາຍມະຫາຊົນກ້າວໜ້າທີ່ໄດ້ຮັບການຝຶກອົບຮົມ ຈຳນວນ 39 ສະຫາຍ, ຍິງ 18 ສະຫາຍ ເຊີ່ງມາຈາກ 6 ຮາກຖານພັກ ແລະ 3 ໜວ່ຍພັກຮາກຖານ.

    ໃນພິທີ ສະຫາຍ ບຸນປັນ ມະຫາລາດ ຮອງເລຂາໜ່ວຍພັກຮາກຖານ ຮອງຫົວໜ້າຄະນະໂຄສະນາອົບຮົມແຂວງ ໄດ້ມີຄໍາເຫັນໂອ້ລົມ ແລະ ກ່າວເປີດຊຸດອົບຮົມໃນຄັ້ງນີ້, ເຊິ່ງໄດ້ສະແດງຄວາມຊົມເຊີຍຕໍ່ການນຳຄະນະພັກຮາກຖານ ແລະ ໜ່ວຍພັກຮາກຖານ ທີ່ໄດ້ເອົາໃຈໃສ່ວຽກງານຂະຫຍາຍພັກດ ແລະ ໄດ້ສົ່ງມະຫາຊົນກ້າວໜ້າເຂົ້າຝຶກອົບຮົມໃນຄັ້ງນີ້ ແລະ ສະແດງຄວາມຊົມເຊີຍຕໍ່ຄະນະຮັບຜິດຊອບຊຸດຝຶກອົບຮົມໃນຄັ້ງນິ້ ທີ່ໄດ້ກະກຽມເງື່ອນໄຂຄວາມພ້ອມໃນທຸກໆດ້ານ ເປັນຕົ້ນ: ສະຖານທີ່, ເນື້ອໃນ ແລະ ສິ່ງອໍານວຍຄວາມສະດວກອື່ນໆ ເຫັນວ່າທ່ວງທັນກັບເວລາທີ່ໄດ້ກໍານົດໄວ້, ພ້ອມນັ້ນ ກໍ່ນັ້ນໜັກວ່າ: ມະຫາຊົນແມ່ນກຳລັງພື້ນຖານ ແລະ ເປັນກຳລັງຕັດສິນຂອງທຸກໆການປະຕິວັດສັງຄົມ ມະຫາຊົນເປັນຜູ້ສ້າງປະຫວັດສາດ, ພາລະກິດປະຕິວັດແມ່ນພາລະກິດຂອງມະຫາຊົນ ເວົ້າລວມ ສະເພາະ ມະຫາຊົນທີ່ກ້າວໜ້າແມ່ນຜູ້ທີ່ໄດ້ຜ່ານການທົດສອບໃນວຽກງານຕົວຈິງ, ມີຄວາມຫ້າວຫັນບຸກບືນ, ມີຄວາມໜັກແໜ້ນທາງດ້ານຄຸນທາດການ ເມືອງ ເຊິ່ງໄດ້ຜ່ານການຝຶກຝົນຫຼໍ່ຫຼອມໃນຂະບວນການຕ່າງໆຂອງມະຫາຊົນ ແລະ ເປັນຜູ້ທີ່ມີຄວາມຕື່ນຕົວທາງດ້ານການເມືອງຕາມອຸດົມການຂອງພັກ, ເຮັດສຳເລັດທຸກໜ້າທີ່ໆ ພັກ ແລະ ການຈັດຕັ້ງມອບໝາຍ​ໃຫ້, ບວກກັບຄວາມເອົາໃຈໃສ່ຂອງຄະນະພັກຮາກຖານ, ໜ່ວຍພັກຮາກຖານອ້ອມຂ້າງແຂວງເຫັນໄດ້ຄວາມສໍາຄັນຂອງວຽກງານການກໍ່ສ້າງພັກ-ຂະຫຍາຍພັກ ໄດ້ເຮັດຕາມພາລະບົດບາດ, ສິດ ແລະ ໜ້າທີ່ຂອງຕົນ.

      ການເປີດຊຸດອົບຮົມ​ເປົ້າໝາຍ​ທີ່ຈະຂະຫຍາຍເຂົ້າພັກໃນ​ຄັ້ງນີ້ ແມ່ນ​ຈະ​ໄດ້​ພ້ອມ​ກັນ​ຄົ້ນຄວ້າ ແລະ ທົບ​ທວນຄືນ​ເຖິງ​ບັນຫາ​ພື້ນຖານ ​ທາງ​ດ້ານ​ທິດ​ສະ​ດີ ທີ່​ປະກອບ​ດ້ວຍ​ບັນດາ​ເນື້ອ​​ໃນ​ເອກ​ະສານ​ສຳຄັນ 13 ຫົວຂໍ້ຄໍາຖາມ - ຄໍາຕອບຄື : 1.  ພັກການເມືອງແມ່ນຫຍັງ ແລະ ເປັນຫຍັງຈຶ່ງມີພັກການເມືອງ?. 2. ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນແນວໃດ? 3. ພັກ​ປະຊາຊົນ ​ປະຕິວັດ​ລາວ ແມ່ນພັກແນວໃດ?. 4. ພັກ​ປະຊາຊົນ ​ປະຕິວັດ​ລາວຈັດຕັ້ງຕາມຫຼັກການອັນໃດແດ່?. 5. ພັກ​ປະຊາຊົນ ​ປະຕິວັດ​ລາວມີລະບົບສາຍໃຍການຈັດຕັ້ງຄືແນວໃດ?. 6. ພັກປະຊາຊົນ ປະຕິວັດລາວ ປະກອບດ້ວຍບຸກຄົນຄືແນວໃດແດ່? 7. ພັກປະຊາຊົນ ປະຕິວັດລາວ ມີວັດຖຸປະສົງ ແລະ ອຸດົມການຄືແນວໃດ? 8. ພັກປະຊາຊົນ ປະຕິວັດລາວ ມີທາດແທ້ແນວໃດ? 9. ມາດຕະຖານ ແລະ ເງື່ອນໄຂຂອງສະມາຊິກພັກ ແລະ ເງື່ອນໄຂມະຫາຊົນຈະຂະຫຍາຍເຂົ້າເປັນສະມາຊິກພັກ ປະຊາຊົນ ປະຕິວັດລາວ ມີແນວໃດ? 10. ສະມາຊິກພັກມີໜ້າທີ່, ພັນທະ ແລະ ມີຜົນປະໂຫຍດຫຍັງແດ່11. ຂໍ້ຫ້າມສໍາລັບສະມາຊິກພັກປະຊາຊົນ ປະຕິວັດລາວມີຫຍັງແດ່? 12. ເຂົ້າເປັນສະມາຊິກພັກ ປະຊາຊົນ ປະຕິວັດລາວ ເພື່ອຫຍັງ? 13. ຖ້າໄດ້ເຂົ້າເປັນສະມາຊິກ ພັກປະຊາຊົນ ປະຕິວັດລາວແລ້ວຈະປົກປ້ອງບົດບາດ, ກຽດສັກສີຂອງພັກເຮົາຄືແນວໃດ?

        ບັນດາເອກະສານເຫຼົ່ານີ້ ເປັນເອກະສານສຳຄັນທີ່ສຸດ; ສະນັ້ນ ເພື່ອເຮັດໃຫ້ຊຸດອົບຮົມໃນຄັ້ງນີ້ ໄດ້ບັນລຸຕາມຈຸດປະສົງລະດັບຄາດໝາຍທຸກປະການນັ້ນ ຂໍຮຽກຮ້ອງ​ມາ​ຍັງ​ບັນດາ​ສະຫາຍມະຫາຊົນກ້າວໜ້າທັງໝົດ ຈົ່ງ​​ເຊີດ​ຊູ​ຄວາມ​ເປັນ​ເຈົ້າການ ​ແລະ ຄວາມ​ຮັບຜິດຊອບ, ສຸມ​ສະຕິ​ປັນຍາ, ປະສົບ​ການ ​ເຂົ້າ​ໃນ​ການຄົ້ນຄວ້າ​ເນື້ອ​ໃນ​ເອກະສານ​ແຕ່​ລະ​ບົດ​ໃຫ້​ເລິກ​ເຊິ່ງ, ຖືກຕ້ອງ, ​ເອົາ​ໃຈ​ໃສ່​ຕິດຕາມ​ການສະ​ເໜີ​, ການບັນ​ລະຍາຍ​ເອກະສານ, ເປັນເຈົ້າການ​ປະກອບ​ຄໍາ​ຄິດ​ຄໍາ​ເຫັນ ​ເພື່ອ​ແລກປ່ຽນ​ສົນທະນາ​ກັບ​ໝູ່​ເພື່ອນ ແລະ ຄູ​ອາຈານ, ສົມ​ທຽບ​ທິດ​ສະ​ດີ​​ໃສ່​ກັບພຶດຕິ​ກໍາ​ຕົວ​ຈິງ​ໃຫ້ຫຼາຍ ​ເພື່ອ​ເຮັດ​ໃຫ້ທຸກ​ເນື້ອ​ໃນ, ທຸກ​ບັນຫາ ​ລະອຽດ, ຈະ​ແຈ້ງ, ເລິກ​ເຊິ່ງ, ນຳເອົາເປັນບົດຮຽນໄປໝູນໃຊ້ ແລະ ເປັນທິດສະດີເຍືອງທາງສຶບຕໍ່ຝຶກຝົນຫຼໍ່ຫຼອມຕົນເອງໃຫ້ດີຂຶ້ນເປັນກ້າວໆ.

 

ຊົມເຊີຍວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີ

ວີດີໂອ....

ເຊື່ອມຕໍ່ເວບໄຊ້ທ

ເລກໂທ ສຸກເສີນ

ແຈ້ງໄຟໄໝ້:   1190
ຕຳຫຼວດ:       1191
ລົດໂຮງໝໍ:    1195
ໄຟຟ້າ:          1199
ນໍ້າປະປາ:      1169

ສະຖິຕິຜູ້ເຂົ້າຊົມ:

115394
ມື້ນີ້ມື້ນີ້119
ມື້ວານນີ້ມື້ວານນີ້198
ອາທິດນີ້ອາທິດນີ້399
ເດືອນນີ້ເດືອນນີ້4178
ທັງໝົດທັງໝົດ115394

ບົດຄວາມທີ່ໄດ້ຮັບຄວາມສົນໃຈ

ສາລະໜ້າຮູ້

ກິດຈະກຳ