ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມທົ່ວແຂວງ ປະຈໍາປີ 2021

ລາຍລະອຽດ

ສ້າງຂື້ນເມື່ອ ວັນພຸດ, 23 ມີນາ 2022 10:32

ຂຽນໂດຍ ptcps

ກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມທົ່ວແຂວງ ປະຈໍາປີ 2021

    ໃນຕອນເຊົ້າຂອງວັນທີ 23 ມີນາ 2022 ຄະນະໂຄສະນາອົບຮົມແຂວງຈຳປາສັກ ໄດ້ໄຂກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມ ທົ່ວແຂວງ ປະຈຳປີ 2021 ແລະ ວາງທິດທາງແຜນການຈຸດສຸມ ປີ 2022 ຂຶ້ນທີ່ຫ້ອງປະຊຸມ 406 ສຳນັກງານປົກຄອງແຂວງ; ພາຍໃຕ້ການໃຫ້ກຽດເປັນປະທານກ່າວໄຂກອງປະຊຸມ ຂອງສະຫາຍ ປອ ສຸປານີ ສີລິປຸນໂຍ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ.

ໂດຍການໃຫ້ກຽດເຂົ້າຮ່ວມຂອງບັນດາສະຫາຍ ຮອງເລຂາພັກເມືອງ ຜູ້ຊີ້ນຳວຽກງານການເມືອງແນວຄິດ ຂອງເມືອງ-ນະຄອນ, ສະຫາຍ ບົວສອນ ວົງຫາຈັກ ເລຂາໜ່ວຍພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງ, ບັນດາສະຫາຍຫົວໜ້າຄະນະໂຄສະນາອົບຮົມເມືອງ-ນະຄອນ, ຄະນະພັກ-ຄະນະພະແນກການອອ້ມຂ້າງແຂວງ, ຄະນະພັກ, ສະມາຊິກພັກ-ພະນັກງານພາຍໃນຄະນະໂຄສະນາອົບຮົມແຂວງ ກໍໄດ້ເຂົ້າຮ່ວມຢ່າງພອ້ມພຽງ.

    ໃນກອງປະຊຸມ ສະຫາຍ ບົວສອນ ວົງຫາຈັກ ເຂາໜ່ວຍພັກຮາກຖານ ຮອງຫົວໜ້າຄະນະໂຄສະນາອົບຮົມແຂວງ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມທົ່ວແຂວງ ປະຈໍາປີ 2021 ແລະ ທິດທາງແຜນການຈຸດສຸມ ປີ 2022, ເຊິ່ງຍົກໃຫ້ເຫັນບັນດາດ້ານຕັ້ງໜ້າ, ດ້ານຄົງຄ້າງ, ສາເຫດທີ່ພາໃຫ້ມີຂໍ້ຄົງຄ້າງ ທີ່ສົງຜົນກະທົບ ແລະ ເປັນສິງທ້າທາຍໃນການເຄື່ອນໄຫວວຽກງານ ເພື່ອກຳນົດແຜນການວຽກງານຈຸດສຸມ ແລະ ມາດຕະການຈັດຕັ້ງປະຕິບັດໃນປີຕໍ່ໜ້າ ໃຫ້ມີຄວາມຖືກຕ້ອງສອດຄ່ອງ, ແທດກັບຕົວຈິງ ແລະ ສາມາດເຄື່ອນໄຫວປະຕິບັດໄດ້ຢ່າງມີປະສິດທິຜົນຂຶ້ນກວ່າເກົ່າ; ນອກນັ້ນ ກອງປະຊຸມຍັງໄດ້ຮັບຟັງການປະກອບຄໍາເຫັນຈາກບັນດາຄະນະໂຄສະນາອົບຮົມເມືອງ-ນະຄອນ ແລະ ພະແນກການ-ກົມກອງອ້ອມຂ້າງແຂວງ ໃນຫົວຂໍ້ຕ່າງໆ, ພ້ອມທັງການປະກອບຄໍາເຫັນຕໍ່ບົດສະຫຼຸບຕີລາຄາການຈັດຕັ້ງປະຕິບັດວຽກງານໂຄສະນາອົບຮົມໃນທົ່ວແຂວງ ຈາກບັນດາຜູ້ແທນກອງປະຊຸມອີກດ້ວຍ.

   ໃນຕອນບ່າຍກອງປະຊຸມໄດ້ຮັບກຽດຈາກ ສະຫາຍ ປອ ວິໄລວົງ ບຸດດາຄໍາ ກໍາມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ເຂົ້າມີຄໍາເຫັນໂອ້ລົມ ແລະ ຊີ້ນໍາຕໍ່ວຽກງານໂຄສະນາອົບຮົມ. ເຊິ່ງກ່ອນອື່່ນທ່ານໄດ້ສະແດງຄວາມຍ້ອງຍໍຊົມເຊີຍຢ່າງສູງ ຕໍ່ຜົນງານທີ່ຄະນະໂຄສະນາອົບຮົມຍາດມາໄດ້ໃນໄລຍະໜຶ່ງປີທີ່ຜ່ານມາ ໂດຍສະເພາະຜົນສໍາເລັດໃນການຈັດຕັ້ງເຊື່ອມຊຶມມະຕິ XI ຂອງພັກ, ມະຕິ VIII ຂອງແຂວງ, ມະຕິຂອງເມືອງ-ນະຄອນ, ການສຶກສາອົບຮົມທິດສະດີ-ແນວທາງຂອງພັກໃຫ້ແກ່ພະນັກງານສະມາຊິກພັກ; ພ້ອມກັນນັ້ນທ່ານກໍໄດ້ເນັ້ນໜັກຕື່ມ 7 ບັນຫາທີ່ສໍາຄັນ ທີ່ຈະຕ້ອງເອົາໃຈໃສ່ສືບຕໍ່ປັບປຸງເພື່ອເຮັດໃຫ້ວຽກງານໂຄສະນາອົບຮົມ ມີການຫັນປ່ຽນໄປສູ່ຄຸນນະພາບໃໝ່ທີ່ດີກວ່າເກົ່າຄື:

1. ຄະນະໂຄສະນາອົບຮົມ, ຄະນະພັກທຸກຂັ້ນ ຕ້ອງເພີ່ມທະວີການນຳພາຈັດຕັ້ງປະຕິບັດວຽກງານໂຄສະນາອົບຮົມໃນຂອບເຂດຂອງຕົນ, ພ້ອມທັງມີການສະຫຼຸບຖອດຖອນບົດຮຽນ ແລະ ສັງລວມລາຍງານຂັ້ນເທິງຢ່າງເປັນປົກກະຕິຕໍ່ເນື່ອງ.

2. ຕ້ອງສ້າງການຫັນປ່ຽນຢ່າງແຂງແຮງ ເລິກເຊີ່ງ ໃນການເຄື່ອນໄຫວວຽກງານໂຄສະນາອົບຮົມ ໂດຍສະເພສະດ້ານເນື້ອໃນ, ຮູບ ການ ໃຫ້ມີໃບໜ້າໃໝ່, ສະເໜີວິທີການໃຫ້ແກ່ຂັ້ນເທິງ. ນອກນັ້ນ, ພະນັກງານໂຄສະນາຕ້ອງເປັນເຈົ້າການໃນການຫັນປ່ຽນຕົນ ເອງໃຫ້ມີຄວາມເປັນແບບຢ່າງນໍາໜ້າ, ມີຄວາມຮູ້ຄວາມສາມາດຮອບດ້ານ.

3. ສຸມໃສ່ປັບປຸງກົງຈັກຂອງໂຄສະນາຂັ້ນແຂວງ, ເມືອງ-ນະຄອນ ຕະຫຼອດຮອດກົງຈັກຂອງພະແນກການອອ້ມຂ້າງທີ່ເຮັດວຽກງານໂຄສະນາອົບ ຮົມ, ໂດຍສະເພາະນຳໃຊ້ບຸກຄົນທີ່ມີຄງາມຮູ້ ຄວາມສາມາດ, ວ່ອງໄວ, ຮູ້ເຕັກນິກວິຊາການ; ນອກນັ້ນ ຕ້ອງກຳນົດແຜນສ້າງພະນັກ ງານ-ສະມາ ຊິກພັກຂອງຕົນ.

4. ໂຄສະນາອົບຮົມ ກໍຄື ໂຮງຮຽນທິດສະດການເມືອງ-ການປົກຄອງ ຕ້ອງຄົ້ນຄວ້າທິດສະດີ-ພຶດຕິກຳຕົວຈິງ ຂອງຜົນງານທີ່ໄດ້ບັນຸຜົນສໍາເລັດທັງຂັ້ນແຂວງ, ເມືອງ-ນະຄອນ.

5. ເພີ່ມທະວີຂອດປະສານງານ ລະຫວ່າງ ຄະນະໂຄສະນາອົບຮົມສູນກາງກັບແຂວງ, ແຂວງກັບເມືອງ-ນະຄອນ ໂດຍສະເພາະທິດໃນການນໍາພາ-ຊີ້ນໍາ, ແບບແຜນວິທີເຮັດວຽກ ໃຫ້ມີຄວາມສອດຄ່ອງ ກົມກຽມ ແລະ ດໍາເນີນໄປໃນທິດດຽວກັນ.

6. ຕ້ອງຍົກສູງການນຳໃຊ້ເຄື່ອງມືທີ່ທັນສະໄໝໃນການໂຄສະນາ, ການຮັບ-ສົ່ງ, ການຕອບໂຕຂໍ້ມູນ-ຂ່າວສານທາງດ້ານເອເລັກໂຕນິກ ເພື່ອເຮັດໃຫ້ວຽກງານເຂົ້າເຖິງເປົ້າໝາຍໃນທົ່ວສັງຄົມ.

7. ຕ້ອງກຳນົດແຜນງານ, ໂຄງການ, ແຜນງົບປະມານໃຫ້ຊັດເຈນ ເພື່ອສະດວກໃນການຄົ້ນຄວ້າຕອບສະໜອງງົບປະມານ.

   ໃນຕອນທ້າຍ ສະຫາຍ ປອ ສຸປານີ ສິລິປຸນໂຍ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ໄດ້ຂຶ້ນຮັບຄໍາໂອວາດ, ຕ່າງໜ້າຄະນະໂຄສະນາອົບຮົມ ມອບຂອງຂວັນແດ່ສະຫາຍ ເລຂາພັກແຂວງ ແລະ ກ່າວປິດກອງປະຊຸມຢ່າງເປັນທາງການ.

• < ຕໍ່ໄປ
• ຕໍ່ໄປ >